|
 |
Jacob Regnart
(1540-1599)
Inhaltsverzeichnis der
Gedichte:
I.
On dich muß ich mich aller freuden massen/
Wo du nit bist/ da mag mich nichts erfrewen/
Kompt alles her/ allein auß deiner trewen/
Ja wann ich dich/ sol gantz und gar verlassen/
Und mich umb lieb/ in ander weg bewerben/
So müst ich doch/ vor laid gewißlich sterben/
Dann mich dein schön/ gefangen hat dermassen/
Daß ich dein nit/ wird können gar vergessen/
So hart hast mir/ Jungfraw mein Hertz besessen.
Weil ichs dann main/ in ehren und in züchten/
So hoff ich noch/ und förchte mir mit nichten/
Gott wird es selbs/ zu seiner zeit wol richten.
_____
II.
Wann ich gedenck der stund/ da ich must scheiden/
Wie dann geschehen wird in kurtzen tagen/
Mein hertz im Leib/ wil mir vor laid/ verzagen.
Dann daß ich dich/ sol ewiglich vermeiden/
Thut alle freud von mir/ gentzlich verjagen/
Mein hertz im Leib/ wil mir vor laid/ verzagen.
Hilff Gott daß ichs mög als/ gedultig leiden/
Hilff mir solch ungewohnten/ schmertzen tragen/
Mein hertz im Leib/ wil mir vor laid/ verzagen.
Weil ich dann muß darvon/ mit trawren fahren/
Und dich nit sehen mehr/ in vilen Jaren/
So wöll dich Gott/ in freud ohn laid bewahren.
_____
III.
Nun bin ich einmal frey/ von liebes banden/
Und thu jetzund allein/ nach kurtzweil ringen/
Deß mag ich wol mit lust/ ein Liedlein singen.
Kein trawren ist bey mir/ nicht mehr verhanden/
Vor freuden thut mir offt/ mein Hertz auffspringen/
Deß mag ich wol mit lust/ ein Liedlein singen.
In lieb ich der gfahr/ so vil erstanden/
Drein ich hinfür nicht mehr/ werd sein zubringen/
Deß mag ich wol mit lust/ ein Liedlein singen.
Darumb all die jr seit/ mit lieb umb geben/
Zu wenden widerumb/ befleist euch eben/
So lieb euch jmmer ist/ ewr leib und leben.
_____
IV.
Ach hartes hertz/ laß dich doch eins erwaichen/
Laß mich zu deiner huld endlich geraichen/
Wem sol doch nicht erbarmen/
daß ichs muß alls erarmen/
Ach starcker Felß/ laß dich doch eins bewegen/
Thu dein gewohnte Hertt/ eins von dir legen/
Wem sol doch nit erbarmen/
daß ichs muß alls erarmen/
Ach veste Burg/ laß dich doch eins gewinnen/
Ach reicher Brunn/ laß mich nit gar verbrinnen/
Wem sol doch nit erbarmen/
daß ichs muß alls erarmen/
Ach Jungfraw merckt/ doch dises wort darneben/
Wann jr mir mit ewr Hertt/ dem todt werd geben/
So habt jr auch/ merckt eben/
Verwürckt ewr junges Leben.
_____
V.
Lieb und vernunfft/ die habn bey mir ein streit/
Lieb nach begier mit sporens straich mich reit/
Vernunfft helt mich/ im zaum zu rucken weit.
Gwalt thue ich mir/ zu dempffen liebes gwalt/
Darzu vernunfft/ sich brauchet manigfalt.
Doch hilffts nit vil/ der schad ist gar zu alt.
Ich bsorgt ich werd/ solchs nit mehr treiben lang/
Dann mir offt wird/ in meinem sinn so bang/
Als wann mir leg/ am Halß des todtes strang.
Gott ruff ich an/ daß er mir bey wöll steen/
Und weisen mich/ dieweil der weg sind zween/
Wohin ich sol/ nach seinem willen gehn.
_____
VI.
Ein Lieb nit mehr hat/ in meim hertzen stat/
Dieselb allein mich starck gebunden hat/
Wird sie mir nit/ so waiß ich mein kein rath.
Gegn jr allein/ mein Hert gantz ist gericht/
Sie ist mein hail/ mein trost/ mein zuversicht/
Ist mit mir auß/ sol sie mir werden nicht.
Klein erstlich war/ solch meiner lieb anfang/
Doch mit der zeit/ kam ich in grössern zwang/
Wird sie mir nit/ so leb ich gwiß nit lang.
Nur jhrenthalb/ duld ich neid/ haß und spott/
Ja wird sie mir/ so kom ich gar auß noht/
Daß solchs bald gscheh/ das geb der ewig Gott.
_____
VII.
Nun hab ich doch einmal erlebt die stund/
In deren ich mich rhümen mag gut rund/
Daß ich sey gantz von liebes sucht gesund.
Daher ich jetzt/ ohn alles trawren bin/
Wil auch allzeit/ erhalten solchen sinn/
Mein lieb und laid/ seind all zugleich dahin.
Hievor hab ich/ getrawret spat und frue/
Auch nit ein stund/ kunden gehaben rhue/
Ich waiß daß sie/ nur hat gelacht darzue.
Drumb sol in laid/ kein Mensch verzagen nicht/
Sonder zu Gott/ setzen sein zuversicht/
Im sey gedanckt/ er hats also gericht.
_____
VIII.
Venus du und dein Kind/
seit alle bayde blind/
Und pflegt auch zu verblenden/
wer sich zu euch thut wenden/
Wie ich wol hab erfahren/
in meinen jungen Jaren.
Amor du Kindlein bloß/
Wem dein vergifftes Gschoß/
Das Hertz einmal berhüret/
Der wird als bald verführet/
Wie ich wol hab erfahren/
In meinen jungen Jaren.
Für nur ein freud allein/
Gibstu vil tausent pein/
Für nur ein freundlichs schertzen/
Gibstu vil tausent schmertzen/
Wie ich wol hab erfahren/
In meinen jungen Jaren/
Drumb rath ich jederman/
Von Lieb bald abzustahn/
Dann nichts ist zu erjagen/
In Lieb/ dann weh und klagen/
Das hab ich alls erfahren/
In meinen jungen Jaren.
_____
IX.
Von nöten ist/ daß ich jetzt trag gedult/
Umb daß ich hab gegn jr getragen huld/
Ich bin schabab/ gleich wol ohn all mein schuld.
Doch tröstet mich/ Ich bin der erste nit/
Es ist vor lengst/ gewesen auch Jr sit/
Ich bin schabab/ daneben doch mit frid.
Dann sie ist nur/ auff falsch und list gedacht/
All lieb und trew/ bey Jr nur wird verlacht/
Ich bin schabab/ deß ich doch nit vil acht.
Gedult allein/ erhelt im leben mich/
In disem spill/ sovil ich dessen sich/
Die letzte Läß/ gewint allzeit den Stich.
_____
X.
Mein mund der singt/ mein hertz vor trawren waint/
So bößlich seind/ mein mund und hertz veraint/
Daß solchs künd sein/ het ich niemals gemaint.
Mit singen ich/ gleichwol mein zeit vertreib/
Daneben doch/ in langweil allzeit bleib/
Das schaffet alls/ ein Adeliches Weib.
Dann daß die nit/ mag widerfahren mir/
Nach deren strebt/ mein Hertz/ muet und begier/
Das möchte mich/ von Sinnen bringen schier.
Ich glaub daß ich/ darzu geboren sey/
Daß ich von lieb/ mag nimmer leben frey/
So ich doch nichts/ alls Elend hab darbey.
_____
XI.
Kanstu gegn mir so grosse falschheit uben/
Und mich dardurch so jämmerlich betrüben/
Ist nit der brauch/ daß ich dich mehr sol lieben.
Kanst mit deinr trew/ so gschwind zu rucken zauffen/
Kanstu so bald/ mich hinderrucks verkauffen/
Ist nit der brauch/ daß ich dir sol nachlauffen.
Kanstu dein nutz/ in ander weg betrachten/
Kan alle trew/ bey dir so bald verschmachten/
Ist nit der brauch/ daß ich dein mehr sol achten.
Kan dich nun mehr/ all deiner falschheit rewen/
Wolstu jetzund/ dein lieb gegn mir vernewen/
Ist nit der brauch/ daß du es mainst mit trewen.
_____
XII.
Nun sih ich mich an dir endlich gerochen/
Darumb dein laid/ Ich gar wol günne dir/
Das radt geht umb/ vor war die klag an mir.
Du hast dein Trew/ an mir schändlich gebrochen/
Solch wanckelmuht/ ist nit Jungfrawen zier/
Das radt geht umb/ vor war die klag an mir.
Thue was du wilt/ magst wainen oder bochen/
Es gilt mir gleich/ Ich leg dirs auff die wag/
Das radt geht umb/ wiltu jetzund so klag.
_____
XIII.
Ich hab vermaint/ ich sey zum besten dran/
Und künd jhr lieb/ keim andern werden gmain/
Jetzt wend Sie sich gen einem alten Mann.
Sie hat offt gsagt/ sie wolt kein andern han/
Und bleiben stet/ in lieb gegn mir allein/
Jetzt wendt sie sich/ gen einen alten Mann.
Darauß ich gnueg jhrn wanckl spüren kan/
Vor liebt sie mich/ gleichwol mit trewen klein.
Jetzt wendt sie sich/ gen einen alten Mann.
Nun hat sie mir/ Ich jr doch nit nachgstelt/
Daß waiß sie selbs/ ich merckt wol was jr fehlt/
Dann sie liebt nit/ den Alten nur sein Gelt.
_____
XIV.
Glaub nit daß ich kund sein so gar vermessen/
Daß ich dich sol/
ja wolt ich wol/
so gantz und gar auffgeben/
Ich brecht mich selbs ums leben.
Glaub nit daß hab mein Hertz jemand besessen/
Nach dir allein/
Waist wen ich mein/
Ich hab dir trew geschworen/
Kehr dich an keinen Zoren.
Glaub nit daß ich nit ingedenck sey dessen/
Was ich bey mir/
Gelobt hab dir/
Es wer doch auß der massen/
Daß ich dich sol verlassen.
Glaub nit daß sey all meine Lieb vergessen/
Dein und mein Trew/
Seind bey mir new/
Kein Klaffer laß dich wenden/
Es wird sich alls wol enden.
_____
XV.
Wer sehen wil zwen lebendige Brunnen/
Der sol mein zwey betrübte Augen sehen/
Die mir vor wainen schier seind außgerunnen.
Wer sehen wil/ vil groß und tieffe wunden/
Der sol mein seer/ verwundtes hertz besehen/
Also hats lieb/ verseert oben und unden.
Wer sehen wil/ ein Brunst groß ungehewr/
Der soll allein/ mich armen Mann besehen/
Dann ich brinn gantz und gar/ von liebes fewr.
Wer wissen wil/ wer mir auffthue solch plagen/
Sol nach der schönsten auff der Erden fragen/
Sie ist allein/ ursach all meiner klagen.
_____
XVI.
Wer wirdet trösten mich/
wann ich verleure dich/
Wie wird mir müssen gschehen/
wann ich dich nit kan sehen/
Mich dunckt bey all mein sinnen/
ich werd in lieb verbrinnen.
Wann ich die süsse wort/
Die ich offt hab gehört/
Nit mehr wird können hören/
So ists mit mir verloren/
Mich dunckt bey all mein sinnen/
Ich werd in lieb verbrinnen.
Die Adelichen blick/
Dardurch Amor sein strick/
An mich thet erstlich werffen/
Thun mir mein leiden scherpffen/
Mich dunckt bey all mein sinnen/
Ich werd in lieb verbrinnen.
Darumb Hertzlieb bedenck/
Wie hart mich dises krenck/
Und laß dir gehn zu hertzen/
Mein kümmerlichen schmertzen/
Doch halts bey dir alleine/
Du waist wol wen ich meine.
_____
XVII.
Wer sich mit liebes sucht empfindet besessen/
Mag sagen wol das glück hab sein vergessen/
Muß uber macht manch sawren bissen essen.
Dann er als bald bekombt/ gar vil zuschaffen/
Im besten frid/ schreit er offt waffen/ waffen/
Muß wachen offt/ wann andre rüwig schlaffen.
Nach eines andern sinn/ muß er sich richten/
Bemüht sich vil/ mit dencken und mit dichten/
Welchs alles jn/ doch hilfft sovil als nichten.
Lieb bringet wunder selten grossen frummen/
In schaden schwer/ dardurch ist mancher kummen/
Lieb ist ein Narrheit groß/ in einer summen.
_____
XVIII.
Ach schwacher Geist/ der du mit sovil leiden/
Beladen bist/ wirstu nit bald abscheiden/
Und disen leib/ sambt allem laid vermeiden.
Ach brinnends Hertz/ wird dich nit schier verzeren/
Das fewr so du/ mit schmertzen thust ernehren/
Wie kanstu dich/ so lange zeit erwehren.
Ach Englischs gsicht/ Ach Hertz von eytel stainen/
Wer möchte doch/ auff Erden je vermainen/
Daß dir nit sol/ zu hertzen gehen mein wainen/
Ach Gott der Lieb/ laß doch jhr hertz empfinden/
Dein fewr/ thue sie/ gegn mir in lieb entzünden/
So wil dein lob/ ich ewigklich verkünden.
_____
XIX.
Mit laid bin ich/ gleich einem last beschwert/
Kündt haben nicht auff erden grösser pein/
Undanckbars Hertz/ wie magstu sein so hert.
Daß ich von dir/ nit werden mag gewert/
Bringt trübsal vil/ dem armen hertzen mein/
Undanckbars Hertz/ wie magstu sein so hert.
Gedenck doch recht/ das elende gefertt/
So ich jetzt führ/ nur umb den willen dein/
Undanckbars Hertz/ wie magstu sein so hert.
Ach wee der sach/ was sol anfahen ich/
Wolt Gott es möcht/ mein leben enden sich/
Undanckbars Hertz/ meins laids erbarme dich.
_____
XX.
Merckt alle die/ in liebes Orden leben/
Wie mir mein glück/ so gar thut widerstreben/
der ich gefall/ die ist mir gall/
mag jr kein guts verjähen/ Ich mag sie nit ansehen.
Daneben die mir thut allein gefallen/
Die hasset mich/ und ist mir feind vor allen/
In jhrer lieb/ ich mich stets yeb/
Ich möcht vor laid verschmachten/ daß sie mein nit wil achten.
Ob ich nun sorg/ daß mir nit müg gelingen/
So thu ich doch/ nach jr gar hefftigt ringen/
Bey all meim sinn/ ich rasend bin/
Bey offnen augen blind/ bey jaren vil ein kind.
Doch hoff ich noch/ sie sol zu letzt bedencken/
Wie ich mich thue/ in jhrem dienst bekrencken/
Und dann endlich/ gewehren mich/
Ich kan mirs nit außschlagen/ gschichts nit/ ich muß verzagen.
_____
XXI.
Kein grösser freud kan sein auff diser erden/
Die widerfahren mag/ eim jungen hertzen/
Dann lieben und gwiß sein/ geliebt zu werden.
Hergegen hab ich nie/ in all meim leben/
Erfahren daß mir mehr/ wendt alles schertzen/
Als wann ich liebes hab/ müssen auffgeben.
Dann unfall auch darein/ gar offt thut spilen/
Bringt kummer/ angst und not/ trübsal und schmertzen/
Ist mir geschehen offt/ und andern vilen.
Doch will ich all mein sach/ nur Gott vertrawen/
Und dann auff jhn allein/ mit hoffnung bawen/
So wird mich nimmermehr/ leichtlich gerewen.
_____
XXII.
End hat der streit/ der thorheit ist genug/
Es ist wol zeit/ daß ich würd einmal klug/
dann liebes spil bedarff gar vil/
Muß närrisch sein/ der es anfahen wil.
Durch lieb hat sich verderbt manch Junger Mann/
Darumb frag mich/ wer deß bericht wil han/
Dann lieb verblendt/ Daß biß zum end/
Der mensch sein schad/ noch nutzen nit erkent.
Wers jm gut maint/ gibt jm gut underricht/
Dem wird er feind/ und denckt man güns jm nicht/
Kein trewer rath/ Findt bey jm stat/
Den rechten weg/ sicht er wanns ist zu spat.
Drumb Junger Mann/ ein spiegl hast an mir/
Nimb dich nit an/ umb lieb ehe dirs gebür/
Hüt dich mit fleiß/ Lieb hat vil meuß/
Wol dem der wird/ durch frembden schaden weiß.
_____
XXIII.
Wann ich den gantzen tag/ gefüret hab mein klag/
So gibts mir noch zuschaffen/ bey nacht wann ich soll schlaffen/
Ein traum mit grossem schrecken/ thut mich gar offt auffwecken.
Im schlaff sih ich den schein/ der aller liebsten mein/
Mit einem starcken bogen/ Darauf vil pfeil gezogen/
Damit sie mich wil heben/ Auß disem schweren leben.
Zu solch schrecklichem gsicht/ Kan ich still schweigen nicht/
Und schrey mit lauter stimmen/ Jungfraw last ewren grimmen/
Nit wölt weil ich thu schlaffen/ brauchen gegn mir ewr waffen.
Dagegen schreyet sie/ Doch mag nichts helffen hie/
Dann gegen meinem zoren/ Ist alle hülff verloren/
Dich mag niemand erretten/ Mein hand die muß dich tödten.
Diß hab ich nun zu gwinn/ umb das ich bständig bin/
Gegn euch in lieb und trewen/ Dz sich stets thut vernewen/
Bey tag mein elends klagen/ und nachts solch schwere plagen.
_____
XXIV.
Ey daß ich mich nit schamme/ was sol doch jmmer das/
Daß ich mit liebes flamme/ Mich so verblenden laß
Nach jhr inn lieb zu streben/ So es doch ist vergebens.
Ich thu mich vil besinnen/ Mach mir vil seltzsam lehr/
Wie ich sie möcht gewinnen/ Ist doch gleich hin als her/
Ja brecht ich mich ums leben/ So wers doch alls vergebens/
Ich sih so vil der zeichen/ Daß sie mein achtet klein/
Sie ist nicht zu erweichen/ Ir hertz ist eytel stein/
Was sol ich dann anheben/ So es ist alls vergebens.
Bin jr zu lieb offt gstanden/ Im wind und regen kalt/
Das acht ich mir kein schanden/ Ja doch mein meinung bhalt/
Durch embsig trewes dienen/ Sie nedlich zuversünen.
_____
XXV.
Ob sie gleich fehrt dahin/ Und lest mich armen hie/
So wird doch auß meim sinn/ Ihr Bildnuß kommen nie/
Das hab ich nun zum besten/ damit ich mich mag trösten.
Dann sie ist eingedruckt/ Tieff in das hertze mein/
Und bleibt drinn unverzuckt/ Des mag sie sicher sein/
Das hab ich nun zum besten/ damit ich mich mag trösten.
Es kündt auch die Natur/ Ob sie schon geren wold/
Erschaffen kein Figur/ der ich würd je so hold/
Das hab ich nun zum besten/ damit ich mich mag trösten.
Jedoch bey all dem trost/ Hab ich vil schwerer pein/
In liebes hitz und frost/ Weil ich muß gschaiden sein/
Von jr als die meim hertzen/ Allein gibt freud und schmertzen.
_____
XXVI.
Jungfraw ewr wanckel mut/ Ist mir zu ohren kommen/
Das wird euch thun kein gut/ Und bringen schlechten frommen/
Ist wahr und nicht erlogen/ Habs auß keim finger gsogen.
Ein andrer hat ewr hertz/ Mit newer lieb besessen.
Mein trew ist euch ein schertz/ Der habt jr bald vergessen/
Ist wahr und nicht erlogen/ Habs auß keim finger gsogen.
Daß jr mein darzu spott/ Das ist nun offt beschehen/
Ist keiner zeugnuß not/ Ich hab es selb gesehen/
Ist wahr und nicht erlogen/ Habs auß keim finger gsogen.
Nun sehet wol für euch/ Es möcht euch noch gerewen/
Ein andrer darff zu gleich/ Vergessen auch der trewen/
Und jr gesetzet werden/ Zwischen vil Stül auff Erden.
_____
XXVII.
Jungfraw ewr scharpffe Augen/ Die habn gewaltigklich/
Bekenn ich euch ohn laugen/ In lieb verwundet mich/
Waiß selbst nit wie mir gschicht/ Kan mir selb helffen nicht.
Ewr tugendsames leben/ Ewr wandel keusch und rein/
Freud mich/ bringt mir darneben/ Vil leid und schwere pein/
Waiß selbst nit wie mir gschicht/ Kan mir selb helffen nicht.
Ewr Adelich geberden/ Gebn mir so grossen schmertz/
Deßgleichen nie auff erden/ Versucht liebhabends hertz/
Waiß selbst nit wie mir gschicht/ Kan mir selb helffen nicht.
Ich wolt wol hülff begeren/ Ja wann ich wer so khün/
Durchauß nichts wider ehren/ Wolt jr nun hülffe thun/
Das kündt jr nur allein/ Ir wist wol wen ich mein.
_____
XXVIII.
Daß jr euch gegen mir/ So freundlich thut beweisen/
Deß muß ich nach gebür/ Ewr tugend höchlich preisen/
Und acht es nit für kleine/ Ihr wist wol wen ich meine.
Gar offtmals ich bedenk/ Wie vil freundlicher reden/
Sind gangen und geschwenck/ vilmals zwischen uns beden/
Und acht es nit für kleine/ Ihr wist wol wen ich meine.
Ich darff gedencken nicht/ An dz vertrewlich wincken/
Mit händen und gesicht/ Mein hertz würd mir versincken/
Und acht es nit für kleine/ Ihr wist wol wen ich meine.
Umb dises solt jr mich/ Ohn ende danckbar finden/
Das glaubt mir sicherlich/ Ich würd nit anders künden/
Mein hertz wer dann von steine/ Wist daß ichs hertzlich meine.
_____
XXIX.
Ich bin gen Baden zogen/ Zu leschen ab mein brunst/
So findt ich mich betrogen/ Dann es ist gar umb sunst/
Ich kan das fewr nicht kennen/ Das mir mein hertz thut brennen.
Ich thu mich vilmals weschen/ Mit wasser kalt und haiß/
Und kan doch nichts erleschen/ Ja mein kein rath nit weiß/
Ich kan das fewr nicht kennen/ Das mir mein hertz thut brennen.
An solchem meinem schaden/ Kein lindrung ich empfind/
Je öffter ich thu baden/ Je mehr ich mich entzünd/
Ich kan das fewr nicht kennen/ Das mir mein hertz thut brennen.
Weil dann gegn disem fewre/ Des wassers aigenschafft/
Nit kommen mag zu stewre/ Und hat so gar kein krafft/
Werd jr mich nit entheben/ So kumb ich gwiß umbs leben.
_____
XXX.
Nun jrrt mich nicht/ Gott hats gericht/
Daß wir uns recht in ehren/
zusammen dörffen keren/
Das mag uns niemand wehren.
Vil zanck und grein/ Vil schmertz und pein/
Habn wir alls ubertragen/
Und doch nicht dörffen klagen/
Wie scharpff mann uns thet zwagen.
Wie offt habn wir/ Verzaget schier/
Und uns vil leiden müssen/
Das wöln wir nun geniessen/
Und solts jr vil verdriessen.
Wers ehrlich meint/ Und gantz vereint/
Sein hertz mit Gottes willen/
Der wird sein freud erfüllen/
Gott kan alls laid wol stillen.
_____
XXXI.
Ach Gott wie sol ich singen/ Und leben guter dingen/
So doch nichts ist/ in meim betrübten hertzen/
Als kummer ellend/ trübsal/ angst und schmertzen.
Unfall hat mich besessen/ Des kan ich nit vergessen/
Was ich anfah/ Daß wil mir nicht gelingen/
Wie wölt jr dann/ Daß ich sol frölich singen?
Ich hab mich eingelassen/ In lieb on zil und massen/
Der ich doch nicht/ Kan ewiglich geniessen/
Sol mir das gfallen/ Solls mich nit verdriessen?
Darumb so last mich trawren/ Mein hertzenlaid betawren/
Niemand waiß ich/ Der mich zu freud möcht wenden/
In laid muß ich/ Mein elends leben enden.
_____
XXXII.
Lieb und unfall/ habn underwunden sich/
Durch jhre list/ gantz zuverderben mich/
Das hat das glück/ fürkommen gwaltigklich.
Lieb hat mein hertz/ entzündt gen einer Meid/
Wie mirs ergieng/ waiß jeder leicht bescheid/
Denn ich bald kam/ in grosses hertzenleid.
Unfall zu gleich/ sein gifft auch mischt darein/
Richt an das sie/ nit solte werden mein/
Liebhabends hertz/ denck wie mir gwest müß sein.
Doch daß ich mich/ meins laids jetzund erquickt/
Mit seiner gnad/ verschafft allein das glück/
Gott geb daß sichs/ zum besten alles schick.
_____
XXXIII.
All mein gedancken/ On alles wancken/
Künnen mit nichten/ sich anderst richten/
Als nur gen der allein/ Die ich mit trewen mein.
Wo ich hinwende/ in dem elende/
Mein bayde Augen/ ohn alles laugen/
So sih ich die allein/ die ich mit trewen mein.
Kein Tranck/ kein Speiß/ kein gberd/ kein weiß/
Mag mir gedeyen/ noch mich erfrewen/
Als nur die liebst allein/ die ich mit trewen mein.
In freud in leiden/ in leid in freuden/
Bin ich ohn schertzen/ mit meinem hertzen/
Allzeit bey der allein/ die ich von hertzen mein.
_____
XXXIV.
Wer sich ohn gelt/ zum bulen stellt/
Dem wil ich nichts verhelen/
Sol andern stand erwehlen/
Die kunst würd jm sonst fehlen.
Bulschafft wil han/ ein freyen Mann/
Der sich kein gelt laß tawren/
Wird sonst gesetzt in trawren/
Und ghalten für ein Bawren.
Ein schlechter Mann/ der nit wol kan/
Mit gelt sein Seckel zieren.
Der wird sich selb verführen/
Und all das spill verlieren.
Drumb armer Gsell/ seyst wer da wöll/
Laß bald dein Hertz erkulen/
Steh ab von deinem bulen/
Und geh zu mir in dschulen.
_____
XXXV.
Weil du dann wilt/ gegn mir dein lieb vernewen/
Und alles mainst/ so mit hertzlichen trewen/
So muß mich nichts/ was ich thon hab/ gerewen.
All deine Lieb/ die sol nit sein verloren/
Ob du mich wol/ offt hast bewegt zu zoren/
Daß ist nun hin/ ich hab dir trew geschworen.
Dann lieb sol man/ allzeit mit lieb vergelten/
Wo das nicht gschicht/ da glückt es wunder selten/
Undanckbarkeit/ ist billich hoch zu schelten.
Was jeder mög/ herzu des seinen schwetzen/
Das acht ich nit/ ich hoff uns sol zur letzen/
Der ewig Gott/ nach laid in freuden setzen.
_____
XXXVI.
Mein hertz hat mir/ gesetzt in jhr/
Die lieb gen einer Maiden/
frumb/ erbar und beschaiden/
Die mir kein mensch sol laiden.
Darzu hab ich/ nit lassen mich
Schendtlich wollust bewegen/
Wie jung leut etwa pflegen/
Gleichwol mit schlechtem segen.
In zucht und scham/ gantz tugendsam/
Thut sie sich gen mir naigen/
Gar freundlich sich erzaigen/
Ich hoff sie werd mein aigen.
Wils Gott so gschichts/ sonst sol es nichts/
Dann ausser zucht und ehren/
Würd er mir nichts bescheren/
Ich hoff es sol noch weren.
_____
XXXVII.
Der süsse schlaff der sunst alls stillet wol/
Kan stillen nicht mein hertz mit trawren vol/
Das schafft allein die mich erfrewen sol.
Kein Speiß/ kein Tranck/ mir lust noch nahrung geit/
Kein kurtzweil ist/ die mir mein hertz erfrewt/
Das schafft allein/ die mir im hertzen leit.
Kein gselschafft ich/ nit mehr besuchen mag/
Gantz ainig sitz/ in unmut tag und nacht/
Das schafft allein/ die ich im hertzen trag.
In zuversicht/ allein gen jr ich hang/
Und hoff sie sol/ mich nit verlassen lang/
Sonst fiel ich gwiß/ ins bittern todtes zwang.
_____
XXXVIII.
Daß du von meinet wegen/ gesetzet bist in pein/
Thut mir zu laid bewegen/ Das ellend hertze mein/
Und schmertzet mich nit klein/ daß ich nit hülff kan thun.
Doch weil in liebes Garten/ wie du waist selber wol/
Wechst nichts dann langes warten/ das man gedulden sol/
So hoff auff Gott und glück/ Biß daß sichs anderst schickt.
Hastu lust zu dem süssen/ so laß dich auch darbey/
Des bittern nit verdruessen/ wie schwer das jmmer sey/
Diß ist der alte sitt/ Süß kombt ohn bitters nit.
Hiemit dich Gott gesegen/ wil jetzt nit melden mehr/
Ich hoff nach disem regen/ und ungewitter schwer/
Sol kommen noch die Sonn/ Die mir und dir Gott gonn.
_____
XXXIX.
Gut gsell/ du machst dein klagen/ gar hefftig groß und schwer/
Daneben wilst nit sagen/ was gut und rathsam wer/
Darumb so geh fürbaß/ Und mich zu friden laß.
Euch ist nit gut zu trawen/ ob jr gleich braucht gut wort/
So bald jr ein Jungfrawen/ nur einmal habt bethort/
So last jr bald darvon/ Nembt euch umb andre an.
Ir schreit gar vil von schmertzen/ und machet groß ewr not/
Geht euch doch nit von hertzen/ ist nichts als lauter spot/
Setzt die auffs Narrensail/ Biet euch einer andern fail/
Hüt euch jr jungen Maiden/ glaubt mir zu diser frist/
Last euch die Knaben laiden/ dann sie sein voller list/
Versorget wol ewr Ehr/ Sonst gelt jr nichtes mehr.
_____
XL.
Wiewol sich vil /
zum widerspil/
Meins glückes wil anrichten/
So schreckts mich doch mit nichten/
Wil allzeit frölich singen/
Und solt der Neider hertz darumb zerspringen.
Kein glück ohn neid/
Ohn leid kein freud/
Ist lang der brand gewesen/
Wie ich offt hab gelesen/
Noch wil ich frölich singen.
Und solt der Neider hertz darumb zerspringen.
Manchs menschen Kind/
Mir das nicht gündt/
Was mir Gott thut bescheren/
Und kan mirs doch nit wehren/
Drumb wil ich frölich singen.
Und solt der Neider hertz darumb zerspringen.
Traw Gott allein/
Und achte klein
Was alle Welt mög sagen/
So hört bald auff dein klagen/
Kan dir auch nit mißlingen/
Und solt der Neider hertz darumb zerspringen.
_____
XLI.
Diß ist die zeit/ die mich erfrewt/
Nach der ich hab getrungen/
manch trawrigs Lied gesungen/
Biß mir doch ist gelungen.
Manch schwere pein/ das hertze mein/
Mit schmertz hat uberstanden/
Wer kommen bald in schanden/
Allein durch liebes banden.
Des wil fort an/ so vil ich kan/
Ich selbsten mich ergetzen/
Das ist jetzund mein letzen/
Alls laid zu rucken setzen.
Deßgleich thu du/ und hilff darzu/
Die du auß gleichem leiden/
Erlöset bist zu freuden/
Nun mag uns niemand scheiden.
_____
XLII.
Ich wolt wer mir mein glück nit gündt/
Daß er ein Jar nichts essen kündt/
als was ich jhm solt geben/
Ich wolt jhn seines schweren leibs/ in kurtzer zeit entheben.
Ich wolt daß der verhindert mich
An meinem glück/ solt halten sich/
Ein Jar nach meinem willen/
Ich wolt jm gar in kurtzer zeit/ All seinen hochmut stillen.
Ich wolt daß der mein jetzund spott/
Ein Jar solt halten mein gebott/
Er würd dermassen büssen/
Dz jn gewiß in tagen kurtz/ Seins lebens solt verdriessen.
Daß man mir dises alles thut/
Damit muß ich jetzt habn vergut/
Muß alls zumal erdulden/
Hoff doch es kumb in kürtz die zeit/ Daß ich es mög beschulden.
_____
XLIII.
Nach meiner lieb vil hundert knaben trachten/
Allein den ich lieb hab/ wil mein nicht achten/
Ach weh mir armen maid/ Vor laid muß ich verschmachten.
Jeder begert zu mir sich zuverpflichten/
Allein den ich lieb hab/ thut mich vernichten/
Ach weh mir armen Maid/ Was sol ich dann anrichten.
All andre thun mir gutes vil verjehen/
Allein den ich lieb hab/ mag mich nit sehen/
Ach weh mir armen Maid/ Wie muß mir dann geschehen.
Keinr untern allen mag mir widerstreben/
Allein den ich lieb hab/ wil sich nit geben/
Ach weh mir armen Maid/ Was sol mir dann das leben.
_____
XLIV.
Sagt mir Jungfraw wo here/
Wann ich euch sih/ mein hertz mir wird so schwere/
Darzu mein farb im angsicht sich verkere/
Sagt mirs ich bitt darumben/ woher es möge kommen.
Gar nirgends ich kan bleiben/
Ohn euch/ darzu mag ich kein kurtzweil treiben/
Mein laid kan ich mit worten nicht beschreiben/
Sagt mirs ich bitt darumben/ woher es möge kommen.
Gar nichts mag mich erfrewen/
Was mir vor liebt/ das bringt mir jetzund schewen/
All augenblick mein laid sich thut vernewen/
Sagt mirs ich bitt darumben/ woher es möge kommen.
Nun ist euch unverborgen/
Daß jr seit ursach aller meiner sorgen/
Wann jr nur helffet mir heut oder morgen/
So sag ich jr künd geben/ Den todt und auch das leben.
_____
XLV.
Du hast dich gegen mir/
gar freundlich wol erzeiget/
Auch nach meiner begir/
zu mir nach lust geneiget/
Doch diß alles in ehren/
wer kans und wils uns wehren.
Wie offt hab ich dein hand/
In die meine beschlossen/
Zu einem unterpfand/
Und deiner lieb genossen/
Doch diß alles in ehren/
wer kans und wils uns wehren.
Ach wie verkeren sich/
Mein jnnerliche sinne/
Wann ich gedenck an dich/
Gantz gar vor lieb ich brinne/
Doch diß alles in ehren/
wer kans und wils uns wehren.
So zweiffelt mir nit sehr/
Wir wöln in freuden leben/
Das unglück wird nicht mehr/
Uns dörffen widerstreben/
Wann das geschicht in ehren/
So darffs uns niemand wehren.
_____
XLVI.
Ich hab ein lange zeit/
Meidlein umb dich gefreyt/
Wie du des tregst gut wissen/
Drumb bitt ich sey geflissen/
Auff daß einmal zum end/
möcht kommen gar behend.
Ich wils vor mein person/
An mir nit manglen lon/
Den abend als den morgen/
Ohn underlaß thun sorgen/
Damit wir alle baid/
Ergetzen unser laid.
Weil dann dein sinn und gmüt/
Sich wendt zu meim geblüt/
So hab ich mich ergeben/
Nach deinem willen zleben/
Hertz aller liebste mein
Ich wil dein aigen sein.
Nun wöln wir alle beid/
Leben in grosser freud/
Nach Venus lust und willen/
Und auch Cupido zillen/
Mit unser hertzen gunst/
Leschen der liebe brunst.
_____
XLVII.
Irs gleichen lebt auff erden nicht
der ich mich hab mit lieb verpflicht/
Mit ehrn und zucht/ die edel frucht/
Ist sie gekrönt auff erden/
Die mir/ hoff ich/ sol werden.
Irs gleichen ist noch nit geborn/
So ich mir jetzt hab außerkorn/
Gottßförchtig/ frumb/
In einer summ/
Thut sie Gott hoch begaben/
Und für ander erhaben.
Irs gleichen wird nit mehr auff erd/
Sie ist alls lobs und ehren werdt/
Biß in mein grab/
Laß ich nit ab/
Sie loben/ preissn und ehren.
Kein mensch sol mirs nit wehren.
Irs gleichen/ sag ich noch einmal.
Findt ich weder zu berg noch thal.
Wünsch mir nit mehr/
Noch nichts beger/
Dann nur daß ich/ merck eben/
Bey jr in ehrn solt leben.
_____
XLVIII.
Gut ding muß haben weil/
Drumb gut gsell nit eil/
Dann was bald sol verderben/
Ist leichtlich zu erwerben/
Das wirst du noch erfaren/
Ehe du kombst zu dein Jaren.
Gut ding muß haben weil/
Drumb gut gsell nit eyl/
Und laß dich nit erschrecken/
Wann es sich schon thut strecken/
Das wirst du noch erfaren/
Ehe du kombst zu dein Jaren.
Gut ding muß haben weil/
Drumb gut gsell nit eyl/
Dann es wird offt erlanget/
Damit man lang hat pranget/
Das wirst du noch erfaren/
Ehe du kombst zu dein Jaren.
Gut ding muß haben weil/
Drumb du auch nit eyl/
Dann was dir ist bescheret/
Des wirstu wol geweret/
Und gwißlich noch erfaren/
Ehe du kombst zu dein Jaren.
_____
XLIX.
Ach Gott ein grosse pein/
krencket das hertze mein/
Daß ich mein laid niemand/
je darff machen bekandt/
Ach Gott ein grosse pein.
Das fewr mit hellem schein/
Pflegt jmmer hitzig sein/
Noch brindt vil mehr mein seel/
Durch heimlich fewr und quel/
Ach Gott ein grosse pein.
Die jnnerlichen flamm/
Schlegt ubers hertz zusamm/
In dem fewr ich verbrinn/
Ohn hülff sterb ich dahin/
Ach Gott ein grosse pein.
Auß angst Jungfraw hilff mir/
Mein leben steht bey dir/
Hilff mir auß diser noth/
Sonst gibstu mich dem todt/
Ach Gott ein grosse pein.
_____
L.
Ein süsser traum mich thet/
in nachtes rhu umbfangen/
Allda mich deucht ich het/
die mir macht ein verlangen/
Ich schertzt mit jr/ und sie mit mir/
vermaint ich wer in freuden/
Aber O nacht/ du hast mich bracht/
in angst mit deinem scheiden.
Freundlich ich sie empfieng/
Freundlich wir redten beide/
Freundlich sie mich umbfieng/
Erst wust ich nichts von leide/
Ich schertzt mit jr/ und sie mit mir/
vermaint ich wer in freuden/
Aber O nacht/ du hast mich bracht/
in angst mit deinem scheiden.
Ins Paradeiß ich dacht/
Wollust het uns umbgeben/
Darzu hat uns gebracht/
Das süß vermeinte leben/
Ich schertzt mit jr/ und sie mit mir/
vermaint ich wer in freuden/
Aber O nacht/ du hast mich bracht/
in angst mit deinem scheiden.
In dem der tag anbrach/
Die Sonn die kam geschlichen/
Und da ich nichts ersach/
Ward ich so gar erblichen/
Wolt Gott die nacht/
Weret mit macht/
So blieb ich hie in freuden/
Aber O nacht/
Du hast mir bracht/
Groß angst mit deinem scheiden.
_____
LI.
Du hast urlaub/ drumb saum dich nur nit lang/
Das macht untrew/ die ich jetzt hab gespürt/
Ich baut auff dich/ so hast betrogen mich.
Ich merck gar wol/ und macht mir hertzlich bang/
Daß du solt sein/ durch ein andern verfürt/
Ich baut auff dich/ so hast betrogen mich.
Gsell wiß von mir/ daß dein untrew gesang/
Mir gleichwol hat/ mein witz und sinn verjrrt/
Ich baut auff dich/ so hast betrogen mich.
Wiewol ich mir/ zwar selber darnach rang/
Drumb ich all schuld/ leg auff mein selbst begierd/
Fürwitz thet mich/ betriegen jämmerlich.
_____
LII.
Es müht jr vil mein zugestanden glück/
Frag jetzt nit mehr nach schwetzers neid und tück/
Weil mir mein will gegn dir nit geht zu rück.
Klaff was du wilt/ ich hab gewunnen spil/
Wanns dich verdreust/ so wirst wol schweigen still/
Mich frewt allein/ daß gschehen ist mein will.
O neid ohn schuld/ wer hat dich je geborn/
Doch schadt nit vil/ dein sorg ist schon verlorn/
Gott grüß mir die/ so ich hab außerkorn.
Was ich jetzt wünsch/ das geht den schwetzer an/
Sein untrew kan/ nit unvergolten ston/
Drumb mag er wol/ seins schwetzens abelon.
_____
LIII.
Ein anders wil ich wagen/
Ob ich möcht gunst erjagen/
Da mir das glück/
ohn alle tück/
jetzund wol wil/
als wer zu vil/
Hoff ich das spil zu gwinnen.
Kündt ich jr huld erwerben/
Für sie wolt ich gern sterben/
Dann ich es mein/
Gegn jr allein/
Mit stetigkeit/
In lieb als leid/
Hertz lieb thu dich besinnen.
Mein hertz gar vil geduldet/
Und hats doch nit verschuldet/
Gott waiß mein hertz/
Redt ich ohn schertz/
Het ich hinein/
Ein fensterlein/
Würd man mein hertz recht sehen.
Was mir Gott thut bescheren/
Kan mir kein mensch nit wehren/
Nach Gottes will/
Setz ich mein zill/
Zu freud und noth/
Stets frü und spat/
Hertz lieb vernimb mein flehen.
_____
LIV.
Mein Hertz und gmüt/ ist gar in lieb entzündt/
Allein zu dir all mein geblüt jetzt brindt/
Kein mensch ohn dich/ kan sonst erfrewen mich.
Nur dich allein/ hab ich mir außerwelt/
Auff diser Erd/ mir anders nit gefelt/
Kein mensch ohn dich/ kan sonst erfrewen mich.
Laß O hertz lieb/ dich nit lieb habn umbsonst/
Sondern gib mir/ auch deiner liebe gunst/
Kein mensch ohn dich/ kan sonst erfrewen mich.
Ach Venus mildt/ laß doch erbarmen dir/
Mein grosse noth/ und komb zu hülffe mir/
Kein Mensch ohn dich/ Kan sonst erledign mich.
_____
LV.
Ach Weib du böses kraut/
Ach Weib weh dem dir traut/
Ach Weib ich bin gefangen/
Ach Weib werst du gehangen/
Ach Weib ich muß verzagen/
In meinen jungen tagen.
Ach Weib waß hab ich thon/
Ach Weib daß ich dich hon/
Ach Weib ich muß entrinnen/
Ach Weib ich schaid von hinnen/
Ach Weib ich muß verzagen/
In meinen jungen tagen.
Ach Weib du arger balck/
Ach Weib du znichter schalck/
Ach Weib ich bin verjrret/
Ach Weib hast mich verwirret/
Ach Weib ich muß verzagen/
In meinen jungen tagen.
Darumb sol sich kein Mann/
Ein Weib bethören lan/
Allein er wöll stets klagen/
Und sein von jr verschlagen/
Kein Prügel sol er sparen/
Bey allen seinen Jaren.
_____
LVI.
Bey dir muß ich mich aller freuden massen/
Dann wo du bist/ thust du nichts als greinen/
Mein unfall groß/ muß ich all tag beweinen.
Ach wer ich vor gefaren hin mein strassen/
So het ich nit/ so vil der angst und peinen/
Mein unfall groß/ muß ich all tag beweinen.
Ja wann ich dir sol all dein hochmut lassen/
So wer ich lengst entrunnen von den meinen/
Hoffart thut dir auß baiden augen scheinen.
Weil ichs dann muß die zeit meins lebens treiben/
Und ewiglich/ in diser trübsal bleiben/
So wil ich nichts/ als lauter Klaglied schreiben.
_____
LVII.
Wann ich gedenck der stund/ da sich mein leiden/
Zum ersten mal anfieng sampt meinem klagen/
Mein hertz im leib/ wil mir vor laid/ vor laid verzagen.
Vil lieber wolt ich sein bey Türcken und Haiden/
Als nur bey dir/ die du mein hertz thust nagen/
Mein hertz im leib/ wil mir vor laid/ vor laid verzagen.
Ach daß ich möcht auß disem leben scheiden/
Dann ich mich an dem creutz schon müd hab tragen/
Mein hertz im leib/ wil mir vor laid/ vor laid verzagen.
Weil ich denn muß in so betrübtem wesen/
Wöll oder nit/ ersterben und genesen/
So bitt ich Gott/ er wöll mich bald erlösen.
_____
LVIII.
Weil du so gantz und gar mich thust verachten/
Und denckst kein Weib thet hinfurt nach mir trachten/
So hab ich mit meim frommen/
Gott lob mein theil bekommen.
Du mainst es sey kein mensch jetzund auff Erden/
Die mein begehrt/ und mir zu thail möcht werden/
So hab ich mit meim frommen/
Gott lob mein theil bekommen.
Weil du mir hast/ ohn ursach urlaub geben/
Und mainst ich würd nun ainig müssen leben/
So hab ich mit meim frommen/
Gott lob mein theil bekommen.
Jetzt hör nur auff/ dich weiter zu besinnen/
Nach dir nunmals/ wird mein hertz nimmer brinnen/
Dann ich hab mit meim frommen/
Gott lob ein Weib bekommen.
_____
LIX.
Noch laß ich mich nit krencken/ des Dichters haß und neid/
Nach ehr ich streb/ dieweil ich leb/
Und setz mein zil/ Nach Gottes will/
Der wird unschuld gedencken/ Der ich gedultig leid.
Fragt nit nach meiner ehren/ sih wer du selber bist/
Verletz niemand/ Mit lincker hand/
Damit dich nicht/ Die recht anficht/
Es mag sich bald verkeren/ weils glück so wanckel ist.
Des tröst ich mich von hertzen/ jn schendt sein aigne zung/
Und ist sein neid/ Mein gröste freud/
Sein huld und gunst/ Bey mir umb sunst/
Wz sol mich weiter schmertzen/ weil ich bin starck und jung.
Das sey zu lieb gesungen/ dem Neider gantz und gar/
Bey meines gleich/ Obschon nit reich/
Die mir gefelt/ Und hab erwelt/
Bin ich noch unverdrungen/ allde von hinn ich fahr.
_____
LX.
Kein stund/ kein tag nit ist/
Wann ich gedenck den list/
Den du hast offt begangen/
Wird ich mit zorn umbfangen/
Mein freud pflegt sich zu legen/
Mein trawrigs hertz bewegen.
Hastu dann nit gedacht/
Daß ich hab alls betracht/
Dein thun/ dein sitt und thaten/
Sein sie nun wol gerathen/
Es wird sich selbs erweisen/
Und das werck die that preisen.
Ich bitt gedenck der zeit/
Wie offt sind wir erfreut/
Wann wir zusammen waren/
Kein lust theten wir sparen/
Wie freundlich thetst dich stellen/
Mainst mich dardurch zu fellen.
Ich hoff dennoch zu Gott/
Du werst noch selbst den spott/
Auff deinem rucken tragen/
Dein hertz das wird dich nagen/
Dein gwissen wird sich rhüren/
Glaub mir du wirsts erspüren.
_____
LXI.
Mein hertz das brindt/ ach Gott mein Hertz/
Hilff daß ich nit zu schanden werd/
Wend mir mein grosse schmertzen/
Dann mir ein fein/
Junckfrewelein/
Ligt stets in meinem hertzen.
Mich hat entzündt jr zucht und ehr/
Ir trewes hertz auch noch vil mehr/
Red ich bey meinen trewen/
Hilff Gott zu der/
Die ich beger/
Es sol niemandt gerewen.
Ach Gott von Himmel sich darein/
Und laß uns dir befohlen sein/
Dein gnade zu uns thue senden/
Nach deinem will/
Steh unser zil/
So wirds kein mensch nit wenden.
_____
LXII.
Die arge Welt/
hat sich gestelt/
Wer nit hat gelt/ niemand gefelt/
O weh der argen Welt.
Die beste kunst/
Ist all umb sunst/
Behelt kein gunst/
Gelt macht die brunst/
O schad der guten kunst.
Wann gleich einr wer/
Von tugent schwer/
Hilfft jhn nit sehr/
Gelt bringt die ehr/
O schad der guten kunst.
Welt und gelt hin/
Bhalt dein gewinn/
Es steht mein sinn/
Der tugend in/
O Welt ich fahr dahin.
_____
LXIII.
Nach frawen gunst streb nit so sehr/
Es ist umb sunst folg meiner lehr/
Die wort sein gut/
halt wol in hut/
was folgen thut.
Man gibt gut wort/ der sach ein schein/
Und loben fort/ wölln Dienrin sein/
Biegen sich je/
Biß auff die knie/
Doch triegen sie.
Wann du nun hast/ vollendet gar/
Dein ist die last/ du bist ein Narr/
Dein lohn folgt nicht/
Dein trew und pflicht/
Ist gar entwicht.
Nach Frawen gunst/ streb nit so sehr/
Du dienst umb sunst/ glaub nur nit mehr/
Die wort sein gut/
Halt wol in hut/
Was folgen thut.
_____
LXIV.
Mein ainigs hertz/
mit mir nit schertz/
Zu mir dich lenck/
und mich nit krenck/
biß ingedenck.
Mein höchster hort/
An welchem ort/
Wöllen wir beid/
In lieb ohn leid/
Leben in freud.
Wie lang sol noch/
Diß ungemach/
Herrschen so schwer:
Gib mir ein lehr/
Was zu thun wer.
Gib hülff behend/
So kumbts zum end/
Und solst allein/
Die liebste mein/
Ewigklich sein.
_____
LXV.
O Holdseliges bild/
erzeig dich nit so wild/
Meins hertzens freud und wonne/
dein gsicht leucht wie die Sonne/
Du kanst nach deinem willen/
mein hertzlichs laid wol stillen.
O schön und hübsch gestalt/
Erzeig dich nit so kalt/
Ich bitt sey doch beflissen/
Daß ich dein möcht geniessen/
Du kanst nach deinem willen/
Mein hertzlich laid wol stillen.
Wanns müglich kündte sein/
All marter/ angst und pein/
Die wolt ich für dich leiden/
Nur thu mich nit mehr meiden/
Du kanst nach deinem willen/
Mein hertzlich laid wol stillen.
O letzte zuversicht/
Ich bitt verlaß mich nicht/
Erhalt mich bey meim leben/
Du kanst nemen und geben/
Du kanst nach deinem willen/
Mein hertzlich laid wol stillen.
_____
LXVI.
Jetzt ist genug/
ich werd nun klug/
Durch weibs betrug/
drumb schaid mit fug/
Jetzt ists genug.
Jetzt ist mein zil/
Und auch mein will/
Den Narrenspil/
Nit glauben will/
Jetzt ist mein zil.
Jetzt schaid dahin/
Fraw Venusin/
Es steht mein sinn/
Zu andern gwinn.
Jetzt schaid dahin.
Jetzt nimb mein lehr/
Ich wil nun mehr/
In meim alter/
Trachten nach ehr/
Jetzt nimb mein lehr.
_____
LXVII.
Ach weh mir ist durchschossen/
das junge hertze mein/
Und ligt darin verschlossen/
ein schön Jungfrewelein/
Cupido blind/ secht zu wie gschwind/
hat mich gebracht in pein.
Nun hab ich jres gleichen/
Gesehen keine nie/
Bey Armen noch bey Reichen/
Denn nur alleine die/
Sie ists allein/ ja die ich mein/
Von der ich singe hie.
Nennen wolt ich sie geren/
So ist es doch ohn not/
Ich hab sie lieb in ehren/
Red ich warlich ohn spott/
Dz sie auch mich/ gantz hertzigklich/
Lieb/ geb der ewig Gott.
Allein sie ist die rechte/
Das zart Jungfrawen bildt/
Geborn von edlem Geschlechte/
Sie tregt den ehren schildt/
Schön jünglich/ gantz seuberlich/
Darzu gütig und mild.
Mit lieb bin ich umbgeben/
Mein hertz gantz in mir brindt/
Das bringt mich umb mein leben/
Dann ich bin gar entzündt/
Cupido eyl/ zeug auß dein pfeil/
Kumb mir zu hülff geschwind.
Auff daß mein kürtzlich scheiden/
Mir nicht bringe den todt/
Darzu auch alles leiden/
Venus hilff mir auß not/
Erquicke mich/ das bitt ich dich/
Mit jrem Mündlein rot.
Recht trewlich ich es meine/
Glaub mir ohn allen schertz/
Denn es erkendt sonst keine/
Denn du allein mein hertz/
Darumb behend/ dein kind mir send/
Zu wenden mir mein schmertz.
Ich hab in grossem leide/
Verzerrt so manchen tag/
Nun jetzund ich mich scheide/
Merck eben was ich sag/
Ein stund fürwar/ wird sein ein Jar/
Die dich nit sehen mag.
Allein will ich dich bitten/
Du zarts Jungfrewelein/
Nach adelichen sitten/
Daß du gedenckest mein/
Gleichßfals ob ich/ schon dich nit sich/
Mein hertz bey dir sol sein.
_____
Ende
Aus: Iacobi Regnardi
Fuerstlicher Durchleuchtigkeit
Ertzhertzog Ferdinands +& c. Musici,
vnnd Vice Capelmeisters Teutsche Lieder
mit dreyen stimmen nach art der Neapolitanen
oder Welschen Villanellen:
Zuvor vnderschidlich in drey Theil außgangen
an jetzt aber auß vrsachen vnd mit bewilligung des
Authorn in ein Opus zusamen druckt
Getruckt zu München bey Adam Berg
MDLXXXVII [1587]
[ohne Seitennumerierung]
Biographie:
Regnart, Regnard, Jacob, * um 1540 Douai (?), † 16.10.1599 Prag. - Sänger,
Hofkapellmeister, Komponist.
R. entstammte einer niederländ. Musikerfamilie u. erhielt seine musikal.
Ausbildung in der Prager Hofkapelle (um 1557). Ende 1564 wurde er kaiserl.
Kapellsänger, avancierte 1579 zum Vizekapellmeister u. ging 1582 in
gleicher Funktion an die Erzherzogliche Hofkapelle in Innsbruck (1585
Kapellmeister). Als diese 1596 aufgelöst wurde, kehrte er als
Vizekapellmeister an die Kaiserliche Hofkapelle in Prag zurück. 1568-1570
hielt er sich in Italien auf. Ein Empfehlungsschreiben Orlando di Lassos
bemerkt, »das es ein trefflicher Kerll ist, bescheiden und vernunftig
[...]. Er ist ein Niederlender, redet gutt deutzsch, und kan auch andere
sprachen. Und in Summa ist ein gutter Musicus«. Sein Werk umfaßt 376
Kompositionen, darunter 37 Messen, 195 Motetten, (davon neun mit dt.
Text), zwei Bücher Canzone italiane, zwei Oden, eine Litanei u. ein
Madrigal.
Zu den bedeutendsten Leistungen im dt. Gesellschaftslied in der zweiten
Hälfte des 16. Jh. zählen R.s Kurtzweilige Teutsche Lieder zu dreyen
Stimmen / Nach Art der Neapolitanen oder Welschen Villanellen (1576). Sie
erschienen 1578 noch einmal als erster Teil, nachdem 1577 ein anderer
Theyl herausgekommen war, dem 1579 ein dritter Teil folgte. 1583
vereinigte R. alle drei Teile u. d. T. Teutsche Lieder [...]. Er hat, v.
a. im ersten Teil der Teutschen Lieder, die dt. Liedtexte ital. Vorlagen
nachgebildet u. deren Vers- u. Strophenformen adaptiert, wie z. B. in dem
bekannten »Venus du und dein Kind / seid alle beide blind / und pflegen
auch zu verblenden / wer sich zu euch thut wenden / wie ich wol hab
erfaren / in meinen jungen jaren« - mit drei Strophen zu sechs- bis
siebensilbigen Zeilen nach dem Reimschema aabb/cc. Themen sind die Liebe
u. die Empfindungen eines liebenden Ich: »Ein süßer Traum mich thät / in
Nachtes Ruh umfangen.« Es handelt sich um »eingedeutschte italienische
Renaissancelyrik petrarkischer Observanz, mehr oder weniger versetzt mit
deutschen Volkslied-Motiven« (Brauer). Gegenüber älteren dt. Liedern zeigt
R. »poetische Dialektik, die Kunst der Motiventwicklung durch Antithese
und Steigerung« (Osthoff). Bei der Entwicklung einer deutschsprachigen
Kunstlyrik spielte R. eine Schlüsselrolle. Zumal in Wien (Christoph von
Schallenberg) machten seine petrarkist. Lieder Schule.
R.s Sammlung Neue Kurtzweilige Teutsche Lieder mit fünff stimmen (1580),
bei der er noch mehr als im zweiten u. dritten Teil der Teutschen Lieder
wieder bevorzugt auf ältere dt. Formen u. Motive zurückgriff, bildet mit
ihren Liebesliedern einen Höhepunkt seines
weltl. Liedschaffens. Bekannt ist daraus Einsmal in einem tiefen Tal, in
dem ein Esel als Schiedsricher die Sangeskunst von Nachtigall u. Kuckuck
zu beurteilen hat (Kritikersatire). Unvollständig sind die vierstimmigen
dt. Lieder von 1591.
Aus: Autoren- und
Werklexikon: Digitale Bibliothek Band 9: Killy Literaturlexikon.
|