Friedrich Spee (1591-1635)
Aus der Trutznachtigall


Die Gesponß Jesu spielet im VValdt
mit einer Echo oder vviderschall

In grünem waldt ich newlich saß/
Gen einer steinen Klausen;
Da kam durch zartes laub vnd graß/
Ein sanfftes windlein sausen.
Ein brünlein klar/
Bey seiten war/
So frisch/ vnd frölich spritzet/
Ein Bächlein rein
Auch eben fein
Von holem Felsen schwitzet.

Der schöne Frühling schon begund/
Eß war im halben Mertzen/
Da seufftzet ich von Seelen grundt/
Der brand mir schlug vom hertzen.
Ich JESVM rieff
Auß hertzen tieff/
Ach JESV thet ich klagen:
Da hört ich baldt
Auch auß dem Waldt
Ach JESV/ deutlich sagen.

Gar laut eß mir zun Ohren kam;
Dacht jemand wär im Walde:
Michs drumb nit also wunder nam/
Noch merckets also balde.
Ich sah mich vmb/
Vnd wider vmb/
Ach JESV rieff beyneben:
Alßbaldt in eil/
Wie schneller pfeil/
Ach JESV rieff eß eben.

Ich dacht eß wurd auch jemandt sein/
Den JESV lieb möcht brennen;
Vnd sprach: nun bin ichs nit allein/
Ach möcht jch ihn dann kennen!
Ich rieff/ Hola!
Vnd schnell/ VVer da?
Ob Leuth furüber giengen:
Da thäts Hola!/
Vnd schnell/ VVer da?
Im selben Thon erklingen.

Ich sprach hieher/ hieher gar hell/
Vermeint zu mir solls kommen:
Da sprachs hieher/ hieher gar schnell/
Doch niemandt hab vernommen.
Ich dacht bey mir:
Er ruffet dir/
Mich ließ nach jhm entführen;
Trat auff die Bein
Zum Wald hinein;
Da kont ich niemand spüren.

Ach laß dich sehn; Ich suche dich/
Rieff abermahl behende:
Da rieff eß nur/ Ich suche dich/
Die letzte Wort vom Ende.
Ich widerum
In kurtzer summ;
Weil suchest mich/ komb here:
Da gab eß nur/
Alß wie zuvor/
Die letzte Wort von fehre.

Ey/ dacht ich dan/ ist wunderlich:
Ruff ich; rufft er mir wider;
Such ich nun Ihn/ so sucht er mich:
Mein Haupt ich sencket nider.
 Da fiel mirs ein;
Eß möchte sein
Mein JESVS den ich liebe/
Dems brechte lust/
Daß vnbewust
Er mich in schertz vmbtriebe.

Ich sprach: bistu dan JESVS nicht?
Vnd seufftzet auß dem grunde.
Da sprach eß deutlich JESVS nicht:
Vnd seufftzet auch zur stunde.
Ey wer bist dan?
Mir zeig es an/
Gar freundtlich thet ich fragen;
Doch nichts gewan:
Weil/ zeig es an/
Zu mir eß auch thät sagen.

Bald JESV rieff ich vberlaut/
Ach JESV/ mehr/ vnd mehre.
Da rieff eß JESV gleich so laut/
Ach JESV/ gleich so sehre.
Gschwind ich gedacht:
Man deiner lacht/
Nur hebe dich von hinnen:
Weil jederzeit/
Ohn recht bescheidt/
Man hie mag nichts gewinnen.

Ich sprach: was werd ich machen dan?
Weil nie wilt recht bescheiden.
Drauff bald (alß viel ich kond verstan)
Eß riethe mir zu scheiden.
Ja scheiden zwar
Ich muß fürwar/
Bey dir ich nichts erjage:
Doch eines dich
Muß fragen ich:
Nur dieses mir noch sage.

Mein/ wo dan JEsum treff ich an?
Ist dirs halt vnverborgen?
Da seiner wolts kein wissen han;
Gab nur daß wort verborgen?
Ey dan dich troll/
Rieff ich im groll/
Fahr hin in Gottes nahmen:
Ich auch tratt an/
Vnd wolte gahn/
Da klang von weitem Amen.

Alßdan mit hellem Ach vnd Ach
Die Brust ich schlug in schmertzen:
Gleich selbe wort/ mit selbem schlag
Schien thät eß auch von hertzen.
Ich sprach zu letzt/
Hab gnug geschwetzt/
Wer auch soll dich thun schweigen?
Drauffs endtlich noch/
Mit halbem poch/
Gar deutlich sagte; Schvveigen.

Wolan so schvveige schnell ich rieff:
Schnell rieff eß auch; so schvveige.
Da mach ich mir gedancken tieff;
Daß haupt hinunder neige:
Daß haupt ich senck/
Vnd endlich denck/
Ob wohl (wan mich wurd wenden)
Es auch bereit
Von solcher seit
Mir antwort solte senden.

Drum kehr mich vmb/ vn schawen wil/
 Ruff hin mit gantzer stärcke:
Da bleibts an jener seiten stil/
Kein wörtlein ich vermercke.
Drauff wider wand
Zur ander hand/
Recht zu den holen steinen;
Dan hört ich städt/
Alß offt ich redt/
Ein stimm/ fast gleich der meinen.

Har/ har/ ich nun hab funden dich/
Rieff laut/ weil ichs verstunde.
Da rieff eß auch; hab funden dich/
Nur Wort auß meinem Munde.
Alß dan zu handt:
Hab erst erkandt/
Weils einerseits nur redte/
Daß nur der schall:
Mit gleichem hall
Mit mir gespielet hette.

Ich rieff bistu der VViderschall?
Hieß wilkom jhn beyneben:
Da rieff es laut der VViderschall.
Auch wilkom mir thäts geben.
 Als dan bereit
Wir alle beyd
Noch weiter thäten spielen:
Weil ohne maß/
Ohn vnderlaß/
Die Fugen vnß gefielen.

Wolan/ wolan/ O widerschall/
Weil einmahl dich hab funden;
Ich spielen will mit dir im Ball
Hinfürter manche stunden.
Der Ball so dir
Dan kompt von mir/
Soll heißen JESVS name/
Der Ball so du
Solt schlagen zu/
Soll sein auch JESVS name.

In diesem Wald/ bey diesem Thall
Gar offt ich wil spatziren/
Vnd mich mit dir/ O Widerschall/
Gar freundlich verlustiren.
O süßer Schall!
O schöner Ball!
Mit dir wil vilmahl spilen;
 Biß zu dem Grab
Nit laß ich ab/
Wan schon all Himmel filen.

Mein JEsum wil nun tausentmahl
In Wälden lahn erklingen:
Mit mir auch sollen vberal
Die Bäum vnd Stauden springen.
Daß Laub vnd Graß/
Wans mercken daß
Mit müssens auch zum Reyen:
Vnendtlich mahl/
Durch Berg/ vnd Thal
Wil JESVM frölich schreyen.

O JESV/ liebster JESV mein/
Wie brint mir mein geblüte!
Nun bit ich dich/ Ey laß es sein
Durch deine große güte:
Daß tag/ vnd nacht
In stäter wacht/
Die Welt von dir nur singe;
Vnd immerdar
Daß gantze jahr
Vor dir auß frewden springe.